O PSOE do Pino demanda unha campaña para impulsar o comercio e a hostalería local xunto cun plan de choque económico

Indican que é moi necesario ter realizado unha planificación previa “agora, que xa coñecemos as posibles datas e etapas da desescalada hai que poñer en marcha medidas”

Os Socialistas do Pino solicitan ao Concello a posta en marcha dunha campaña que impulse o comercio e a hostalería local. Dous importantes sectores económicos do concello que, dada a súa vinculación ao Camiño de Santiago, máis están a sufrir as consecuencias da crise económica que provoca a pandemia do Covid-19.

Na petición, dirixida ao Alcalde, inciden na trascendencia deste tipo de campañas co fin, entre outros, de concienciar aos pineses e pinesas da importancia que ten o feito de realizar as compras no comercio de proximidade e tamén demandar os distintos servizos que ofrecen os locais relacionados coa hostalería, clínicas de masaxe, etc., “se todos e todas poñemos o noso grao de area contribuímos a axudar a moitas familias que deixaron de xerar ingresos durante a etapa do confinamento, e que tan importantes son para o noso municipio”, apuntan.

Plataforma dixital

Como unha posible idea resaltan a posta en marcha dunha plataforma dixital onde se permita a todos os negocios locais a promoción online dos seus produtos e servizos.

Plan de choque económico

Así mesmo demanda un plan de choque económico destinado a autónomos, empresas e comerciantes locais, co obxecto de manter as taxas de emprego. Destacando un plan de axudas para os autónomos que manteñan a súa actividade, axudas para as empresas que contraten veciños e veciñas desempregados do Pino, modificacións no pago de impostos e taxas municipais, bonificacións, etc.

Esperan que esta solicitude sexa tida en consideración e que se poña en marcha canto antes, “agora é o momento de actuar, posto que xa coñecemos as posibles datas e etapas da desescalada, e unha boa planificación sempre da resultados”, afirman.