O Grupo Municipal Socialista anuncia que presentará reclamacións ao Orzamento do ano 2021 por considerar que vulnera o ordenamento xurídico, e que se trata dun documento con erros e incompleto

En O Pino, a 20 de xaneiro de 2021. No último pleno celebrado no Concello de O Pino, o Goberno local aprobaba o orzamento para o ano 2021 cos seis votos a favor do Partido Popular, a abstención dos dous  concelleiros do BNG, e o voto en contra dos tres concelleiros do Grupo PSdeG-PSOE.

Orzamento que actualmente se atopa no trámite de información pública, ao efecto de reclamacións, unha vez que foi publicado o anuncio da súa aprobación inicial no Boletín Oficial da Provincia o pasado cinco de xaneiro.

Os Socialistas anuncian, tal como xa indicara no debate da sesión plenaria o seu voceiro -Óscar Vilar-, que nos próximos días presentaran alegacións.

No propio debate denunciaban o escaso marxe de tempo co que contaron para estudar o expediente, ”apenas tivemos 48 horas para unha revisión inicial, e iso que estamos a falar do asunto máis importante que se trata, ou se debería tratar, en calquera concello cada ano”, apuntaban. “Por responsabilidade e pola función de control que nos corresponde era, e segue sendo, máis que suficiente este motivo para xustificar o noso voto en contra”, indican.

Agora, unha vez revisado e estudado o documento, consideran que o Orzamento do exercicio 2021 contén defectos de forma, está incompleto, e, que incluso podería estar a vulnerar o ordenamento xurídico no referente ao cadro de persoal e no anexo relacionado coas subvencións nominativas.

Así mesmo, tamén denuncian que o apartado de investimentos reais está incompleto ao non indicar os proxectos de inversión que se prevén realizar durante este exercicio económico, “en contra do que indica e ordena a Lei Reguladora das Facendas Locais”, apuntan.

Saúdos. Socialistas O Pino