O GRUPO SOCIALISTA RECLÁMALLE Á XUNTA QUE INCLÚA O CPI CAMIÑO DE SANTIAGO DE O PINO NO PLAN DE NOVA ARQUITECTURA PEDAGÓXICA

Noa Díaz, tras petición do PSOE do Pino, incluirá nas emendas aos Orzamentos as obras urxentes de mellora nun centro que aínda non recibiu ningunha actuación de calado dende a súa construción nos anos 70

A parlamentaria socialista Noa Díaz, tras a petición do PSOE do Pino, vén de presentar unha serie de iniciativas parlamentarias para reclamarlle á Xunta que inicie as obras de mellora imprescindibles para o CPI Camiño de Santiago, no concello de O Pino. Díaz lembra que o inmoble, construído nos anos 70, aínda non recibiu ata o día de hoxe ningunha actuación de calado.

Díaz anunciou emendas aos Orzamentos da Xunta para 2023 para garantir a actuación no CPI incluíndo o centro no Plan de Nova Arquitectura Pedagóxica, que conta cun orzamento de 191 millóns de euros para a ampliación, mellora e eficiencia enerxética dos centros educativos. Precisamente as actuacións que precisa o centro, que require dunha actuación urxente de mellora e tamén de eficiencia enerxética.

A parlamentaria socialista lembra que o acordo entre a Xunta e a Fegamp determina que, mentres os concellos se encargan do mantemento, conservación e reparación, a Consellería de Educación debe de facerse cargo das obras de maior calado, como as precisas para este centro. Estas teñen que ver, explica, coa carpintería exterior, a cuberta, a instalación eléctrica e de calefacción ou os baños.